Ida Obolo

Etip Ido Obolo

IDO OBOLO ! IDO OBOLO !! IDO OBOLO !!!

Usem okup kubọk okpọkpọ inu ge gaalek eyi ido geelek mè ìre ebi ife geelek ekaan̄be. Ọmọ okirọ inyi ebi ife geelek eje esese me lek ebi ofifi ife. Ebi ìnan̄a me esese otu usem mêkọt ikaan̄ chieen̄ eru ge, chieen̄ orọmijọn̄ ge mè ìre nchieek ge; ire, inu ge gaalek eyi òkikup kubọk iman̄, eyi òkiche ema ìre esese otu usem kiban̄.

Ebi Obolo mîkaan̄ usem eyi ekigwen Obolo. Usem Obolo îkup okpọkpọ mè ire usem ibot ejit inyi ebi Obolo.

Tap eyi me ekiket kwun̄.

Ebi ìkikpọ inu òfolek Ǹkween̄, Ifuk-ibot Ǹrom mè Orọmijọn̄ me linyọn̄, eyi ekigwen "Educational, Scientific and Cultural Organisation (UNESCO), mîgobo akọp usen iba mè ge me onyan̄ iba me acha geelek isun̄ okpọkpọ ke ìre usen mêkikeek usem ama iman ene me ere geelek me linyọn̄. Usen ya ìre usen orirọ ikekeek, mè inwọnwọọn̄ mè irierie ijọk me ibot Usem ebi ife geelek; mè ìre ebi otu usem iwawa, mè ìre ebi kpewa.

Acha keyi, akọp efit iba mè akọp mè gweregwen (2016), ìre acha eyi ebi Obolo. Ebi ikikpọ chieen̄ me lek inu ukot ikaan, me Ido me agan̄ Otu Mun̄ (Rivers State), mîgobo Usem Obolo ke ìre Usem ama iman ebi agan̄ Otu mun̄ (Rivers State), me acha keyi, acha 2016.

Eya orọ, mîsan̄a egwe iba me ǹde, òrere akọp usen iba mè ita me onyan̄ iba, me acha akọp efit iba mè akọp mè gweregwen (Tuesday 23rd February, 2016), isun̄ isasa inwọọn̄ mè ijibi Obolo ibene ke ìre Usem ama iman me acha 2016 me Agan̄ Otu mun̄.

Inu òbomọnọ irek me orirọ yi ìre echi: Ifana ifufuk mè itutumu usem Obolo, òjijop, ikọ ukpatu, iwaak ubọk, ijejeen̄ inu ikaan ebi Obolo, mè ikpa egebe me usem Obolo.

Ere orirọ yi obomọnọ irek ìre ere National Museum, òso uwu iba me oniin̄ Harley me GRA eyi oka (No.2 Harley Street, Old GRA), me Port Harcourt, me Agan̄ Otu Mun̄ (Rivers State). Mgbọ: 10 eyi ewelegwe (10am).

Ekigwen otutuuk bọn owot Obolo me ìrek geelek, me ere geelek, ibaan̄ mè irieen̄, ibe esibi enu enegọọk esa Ido Obolo mè usem kiban̄ ebaan̄ alọm. Ebi imama Obolo si egọọk enu.

Ina, inyi eji egbaan̄ ubọk me ejit ge esa Ido Obolo eje enyi isi, eji enenwọọn̄, mè ekat Obolo etap me lek, enemin Obolo, mè ebene Obolo, irot keyi Awaji ochebe inyi eji, efo inyọn̄, mè esa me ikeya esun̄ àta iman̄ me mfufuk enyi ebi ukot ikinu me udun̄ kiji.

Obolo, enyi mînu-o !

Isi-uwu